ᐊᖓᔪᖅᑲᐅᑎᑦ ᑲᑎᒪᔨᑦ

ᐱᒋᐊᖅᑐᓂ ᓴᐅᒥᐊᓂ ᐊᖓᔪᖅᑳᖅ ᔭᐃᑯᑉ ᑮᓇᓂᒃ, ᐅᑯᐊ ᒪᕐᕉᒃ ᑐᑭᒧᐊᒃᑎᐅᔫᒃ ᔪᕋᐃᐊᔅ ᐳᑭᕐᓇᖅ ᐊᒻᒪᓗ ᔪᐊᓂ ᓴᓪᓗᕆᓇ, ᐊᓪᓚᑦᑎᕗᑦ ᕋᐃᒪᓐ ᖁᖅᓲᓐ, ᐊᒻᒪᓗ ᐊᖓᔪᖅᑳᑉ ᑐᖏᓕᐊ ᓵᓗᒥ ᕿᑦᓱᐊᓕᒃ.

ᐱᓕᕆᐊᒃᓴᕗᑦ

ᓇᑦᑎᓕᒃ ᐃᑦᑕᕐᓂᓴᖃᕐᕕᒃ ᐅᒃᑯᐃᓚᐅᖅᓯᒪᕗᖅ ᐅᑐᐱᕆ 17,2013-ᒥ ᐅᖅᓱᖅᑑᕐᒥ ᕼᐋᒻᒪᓚᒃᑯᑦ. ᐅᖅᓱᖅᑑᖅ ᐱᖓᓱᓂᒃ ᓄᓇᓕᐅᕗᖅ, ᕿᑎᕐᒥᐅᑦ ᑲᓇᖕᓇᖓᓃᖦᖢᓂ, ᓇᑦᑎᓕᖕᒥᐅᑦ ᑭᖑᕚᕆᓪᓗᐊᑕᖅᖢᓂᔾᔪᒃ. ᐱᖅᑯᓯᑐᖃᐃᑦ ᐃᓕᖅᑯᓯᕐᓗ, ᐃᓚᐅᓪᓗᓂ ᔭᒐᑎᑦᑎᑕᐃᓕᒪᓂᖅ ᓄᓇᓕᖕᓂ ᐅᖃᐅᓯᕐᒥᑦ, ᓴᙱᔪᑦ ᐱᒻᒪᕆᐅᒋᔭᑦ ᐅᖅᓱᖅᑑᒥᑦ. ᓇᑦᑎᓕᖕᒥ ᐃᑦᑕᕐᓂᓴᓕᕆᕕᒃ ᑲᒪᒋᔭᐅᕗᖅ ᓇᑦᑎᓕᖕᒥ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᓄᑦ.

ᓇᑦᑎᓕᖕᒥ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐱᓕᕆᐊᒃᓴᖃᓪᓗᐊᑕᖅᐳᑦ ᓴᐳᔾᔨᖃᑕᐅᖁᓪᓗᒋᑦ ᐃᓕᖅᑯᓯᑦᑎᓐᓂᒃ ᐊᒻᒪ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᓇᑦᑎᓕᖕᒥᐅᑦ. ᓇᑦᑎᓕᒃ ᐃᑦᑕᕐᓂᓴᖃᕐᕕᒃ ᓴᖅᑭᔮᖅᑎᑦᑎᕗᖅ ᓇᑦᑎᓕᖕᒥᐅᑦ ᐃᓕᖅᑯᓯᖓᓐᓂᒃ ᐊᒻᒪ ᐃᓕᖅᑯᓯᑦᑎᓐᓂ ᐅᖃᐅᓯᖓᓂᒡᓗ ᓴᙱᒃᑎᒋᐊᖅᑎᑦᑎᕙᒃᖢᑎᒃ ᓄᓇᓕᖕᓂ. ᓇᑦᑎᓕᖕᒥ ᓴᓇᐅᒐᐃᑦ ᒥᖅᓱᒐᐃᓪᓗ, ᑕᑯᒃᓴᐅᑎᑦᑎᔪᑦ ᐃᓕᖅᑯᓯᕐᒥᓂᒃ ᓴᓇᙳᐊᕐᓂᒃᑯᑦ, ᓄᕕᖅᓴᕐᓂᒃᑯᑦ, ᑎᑎᖅᑐᒐᕐᓂᒃᑯᑦ ᐊᒻᒪ ᐱᖅᑯᓯᒃᑯᑦ ᐱᖁᑎᑐᖃᒃᑯᑦ, ᐊᑐᖅᑕᐅᓲᖑᕗᑦ ᑕᑯᔭᒐᖃᕐᕕᖕᒥ ᐊᓯᖏᓐᓄᑦ ᑕᑯᒃᓴᐅᑎᑕᐅᔪᓄᑦ ᐃᓄᐃᑦ ᐃᓅᓯᖏᓐᓄᑦ ᐊᒻᒪ ᐅᓂᒃᑳᖅᑐᐊᖏᓐᓄᑦ. ᑲᑐᔾᔨᖃᑎᒌᑦ ᐱᕙᓪᓕᐊᑎᑦᑎᔪᒪᕗᑦ ᐃᑦᑕᕐᓂᓴᖃᕐᕕᖕᓂ ᐱᔪᓐᓇᕐᓂᕆᔭᐅᔪᓂᒃ ᓄᓇᓕᖕᓂ ᐊᒻᒪ ᓇᑭᙶᖅᑐᓂᒃ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᒃᓴᓂᒃ ᐱᑕᖃᖅᑐᓂᒃ ᓄᓇᓕᖕᓂ ᐊᒻᒪᓗ ᖃᓪᓗᓈᓂ.

ᑲᑐᔾᔨᖃᑎᒌᖅ ᖃᓄᖅ ᐋᖅᑭᒃᓱᖅᓯᒪᖕᒪᖔᑕ

ᓇᑦᑎᓕᒃ ᐃᑦᑕᕐᓂᓴᖃᕐᕕᒃ ᐋᖅᑭᒃᑕᐅᓚᐅᖅᓯᒪᕗᖅ ᐱᓕᕆᖃᑎᒌᒃᖢᑎᒃ ᓇᑦᑎᓕᖕᒥ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᑦ (NHS) ᐊᒻᒪ ᒪᕐᕉᒃ ᐃᓚᒋᔭᐅᓕᖅᖢᑎᒃ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪ ᐅᖅᓱᖅᑑᕐᒥᐅᑦ ᕼᐋᒻᓚᖓᑦ. ᓇᑦᑎᓕᖕᒥ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑲᒪᒋᔭᒃᓴᖃᖅᐳᑦ ᐊᐅᓚᑦᑎᔭᕆᐊᖃᖅᖢᑎᒃ ᐊᐅᓚᓂᕆᔭᐅᔪᓂᒃ ᑖᔅᓱᒧᖓ ᐃᓂᒧᑦ ᓯᕗᓂᒃᓴᒥᓗ ᐊᒃᑐᐊᓂᓕᖕᓄᑦ ᓇᑉᐸᖅᑎᖅᑕᐅᓯᒪᔪᓄᑦ ᐱᓕᕆᐊᒃᓴᓄᓪᓗ ᐱᕙᓪᓕᐊᓂᕆᔭᐅᔪᒧᑦ. ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᖅᓯᒪᕗᑦ ᐊᑯᓂᐅᔪᒧᑦ ᐊᑐᖅᑐᐊᕈᒪᓪᓗᑎᒃ ᑎᑎᕋᕐᕕᖕᓄᑦ ᐃᓂᒋᔭᖓᓂᑦ ᐃᒡᓗᕐᔪᐊᑉ. ᑕᒪᕐᒥᒃ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪ ᐅᖅᓱᖅᑑᕐᒥᐅᑦ ᕼᐋᒻᒪᓚᖓᑦ ᐃᓚᐅᖃᑦᑕᖅᐳᑦ ᐊᐅᓚᑦᑎᓪᓗᑎᒃ ᑲᑐᔾᔨᖃᑎᒌᓂᒃ ᑎᒃᑯᐊᖅᑕᐅᓪᓗᑎᒃ ᑐᑭᒧᐊᒃᑎᑦᑎᔨᑦ ᐊᒻᒪ ᑲᑐᔾᔨᖃᑎᒌᒃᖢᑎᒃ ᑎᒃᑯᐊᖅᑕᐅᓪᓗᑎᒃ ᑲᑎᒪᑎᑦᑎᔨᒧᑦ.

ᓴᓇᐅᒐᓕᕆᓂᖅ ᐃᑦᑕᕐᓂᓴᓕᕆᓂᕐᓗ

ᓇᑦᑎᓕᒃ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐃᑲᔪᖅᑐᐃᖃᑦᑕᖅᓯᒪᕗᑦ ᓴᓇᙳᐊᖅᑕᐅᕙᒃᑐᓂᒃ/ᓴᓇᙳᐊᖅᑕᐅᔪᓂᒃ ᓄᓇᓕᖕᓂ ᐊᒻᒪ ᐱᓕᕆᐊᒃᓴᓂᒃ ᓴᙱᒃᑎᒋᐊᕈᑕᐅᓪᓗᑎᒃ ᓄᓇᓕᖕᓂ ᐃᓕᖅᑯᓯᕐᒧᑦ ᐊᒻᒪ ᐅᖃᐅᓯᕐᒧᑦ.  ᐊᐅᓚᑦᑎᕙᒃᐳᖅ ᐱᓕᕆᐊᒃᓴᓂᒃ ᐃᓕᖅᑯᓯᑐᖃᒃᑯᑦ ᒥᖅᓱᕐᓂᕐᒥᒃ, ᐋᐳᒥᒃ ᓴᓇᙳᐊᕐᓂᕐᒥᒃ, ᓴᓇᙳᐊᕐᓂᕐᒥᒡᓗ − ᑕᒪᓐᓇ ᑮᓇᐅᔭᖃᖅᑎᑕᐅᓂᕐᒧᑦ ᐱᔪᓐᓇᐅᑎᒋᔭᐅᓪᓗᓂ. ᑖᒃᑯᐊᓕᒫᑦ ᐱᓕᕆᐊᒃᓴᑦ ᓴᙱᒃᑎᒋᐊᕈᑕᐅᕗᑦ ᐃᓄᐃᑦ ᐅᖃᐅᓯᖓᓐᓄᑦ.  ᐊᐅᓚᑕᐅᓪᓗᑎᒃ ᐃᓐᓇᕐᓄᑦ ᐅᖃᓪᓚᓲᓄᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᓕᓐᓂᐊᖅᑎᑦᑎᑎᓪᓗᒋᑦ, ᑕᒪᕐᒥᒃ ᑖᒃᑯᐊ ᐱᓕᕆᐊᑦ ᐱᕕᖃᕈᑕᐅᓚᐅᖅᐳᑦ ᐃᓚᐅᔪᓐᓇᖅᓯᓪᓗᑎᒃᓇᑦᒥᑎᕐᒥᐅᑦ ᐃᓕᓐᓂᐊᕐᓗᑎᒡᓗ ᐅᖃᐅᓯᖅᑕᑐᖃᕐᒥᓂᒃ ᐃᓐᓇᕐᓂᙶᖅᑐᓂᒃ. ᑐᓵᔨᑕᖃᖅᑐᖅ ᑕᐃᑲᓃᑦᑐᑦ ᑖᒃᑯᓇᓂ ᐃᓕᓐᓂᐊᕐᓇᓂ.